SPEECH DI CHARLES COOPER

BRINDIS DI AÑA NOBO MAN-NPA-FK

Mi pueblo di Kòrsou bonochi,

Na nòmber di lider polítiko i direktiva di partido Niun Paso Atras sr. Nelson Pierre,

na nòmber di lider polítiko i direktiva di partido Forsa Kòrsou sr. Gregory Damoen,

na nòmber di direktiva di partido MAN i

na nòmber di mi mes persona, tantu komo lider polítiko di partido MAN i komo esun ku ta enkabesá e lista di Kambio,  esta di union entre e tres partidonan MAN-NPA-FK,

pèrmiti mi di desea abo i hinter bo famia na promé lugá un BON AÑA 2010, ku Dios todopoderoso drama su bendishon riba kada un di nos i ku e aña nobo aki, e aña di kambio berdadero tur nos deseonan lo keda kumplí.

Kompatriotanan, mi pueblo stimá, nos ta pasando den desaroyonan históriko i interesante, kaminda pa promé biaha den nos historia polítiko tres partido a uni forsa pa realmente pone union den práktika. Wak kon mi por para aki nan awe i papia na nòmber di tres lider politiko,  tres direktiva i tres partido den union pa un kousa komun …

Union, pasobra e kousa di Kòrsou ta eksigí esei.

Union, pasobra a yeg’e ora, pa pueblo di Kòrsou uni forsa,

Union, pa yunan di Kòrsou mara huntu,

Union, pa den un esfuerso konhuntu,

traha un moketa i reskatá bienestar,

salvaguardiá nos sobrevivensia polítiko,

garantisá outonomía i eksihí rèspèt pa nos pueblo riba e diferente terenonan ku ta esensial pa nos desaroyo, pa nos dignidat i pa bienestar di nos mes i esun di nos yunan.

P’esei kompatriotanan, nos yamada pa BAN MARA HUNTU, ban laga nos ta den Union ku otro i yuda otro p’asina huntu nos por konstruí e Kòrsou di nos soño.

Un Kòrsou, kaminda kada suidadano di nos isla stimá por hiba un bida digno. Un bida digno, kaminda tin sufisiente trabou pa nos tur por kria nos famia dignamente;

Un Kòrsou, kaminda kada un di nos por forma su hogar den un bario sigur i sigurá;

Un Kòrsou, ku un ambiente salú pa nos yunan por krese i desaroyá tur nan potensial i potensianan na un manera sano i saludabel;

Un Kòrsou di KAMBIO real, esta un Kòrsou ku un repartishon hustu di nos rikesanan natural;

Un Kòrsou ku realmente ta respetá doló di pueblo, dignidat di pueblo pa ta outéntiko i outónomo;

Un Kòrsou liber di preshon i manipulashon polítiko partidista;

Un Kòrsou, mustrando na mundu ku NOS MES POR!!!!!

KOMPATRIOTANAN, MI PUEBLO STIMÁ,

Awe mi kier enfoká riba 4 aspekto…

1. KOSTO DI BIDA

Nos tur a ripará den nos saku, den nos pòtmòni i den nos gastunan di tur dia ku kosto di bida a surpasá tur limite akseptabel den e komunidat aki. Kasi nos niun no kier bai fin di luna na e brievenbus pa saka i wak e resibu di awa i koriente ku tur luna nos tin ku paga. No papia mes di esun di UTS ku e gabinete aki di PAR a duna pèrmit pa subi TELEFASIL ku 25 florin.

Kompará por ehèmpel e doló ku nos grandinan ku ta kobra un miserabel penshun di behes i kobradónan di onderstand ta mester pasa adén.

Kompará e doló ku nan mester pasa adén, esta e loke esnan ku mas a bini ta sufri di e oumentu bárbaró aki di kosto di bida, mester soportá.

Djis kompará nan situashon di miseria i di sufrimentu ku e loke e kompania di ultilidat CUROIL ta bisa na final di aña, esta ku nan a hasi ganashi astronomiko. Esaki de fakto kiermen ku a kobra e pueblo di Kòrsou sèn dimas na kombustibel, durante di aña 2009. Nos a pronostiká esaki for di kuminsamentu di aña 2009 ora ku tabata subi preisnan di kombustibel exajeradamente, ku esaki ta nada mas ku un forma di belasting extra di e gobiernu aktual kontra di e pueblo. Nos a haña rason. Mester bini ku algun akshon pa frena i baha e kosto di bida bèk. Tantu riba tereno di kontròl di preisnan, komo ampliashon di e makutu básiko.  Pero tambe hiba negoshashonan riba un base komersial ku nos bisiñanan ku tin petroleo.

2. ENSEÑANSA I EDUKASHON

Pa drenta Pais Korsou nos mester drenta ku un sistema di ensenansa ku ta sirbi poblashon di e islanan, ku ta bira pais. Partidonan Man, Niun Paso Atras i Forsa Korsou den gobiernu lo kuminsa ku un kumbre di tur instanshanan enbolbi den ensenansa den nos pais, pa bin ku un reorientashon riba nos ensenansa. Deliberashonnan mester wordu hiba ku ta e islanan mester karga nan sistema di ensenansa.

Sinenbargo, mester kita e bareranan i limitashonnan ku aktualmente tin den kaminda di nos yunan su estudio i edukashon, manera entre otro sèn pa buki, kontribushon finansiero (schoolgeld), no tin akseso na internet pa ta konektá ku mundu. Asina nos por sigui menshoná kuantu barera tin den e kaminda di desaroyo di nos yunan. Aki mester bini un KAMBIO. Si nos ta bisa ku nos no tin rekursonan natural, ni mineral. Ta rekurso humano so nos tin ku nos por brinda servisio na mundu hinter,  anto e ora ei NO por tin barera pa Yunan di Kòrsou por yega nan potensial maximo. Enseñansa primario i sekundario mester bira pòrnada di bèrdat…  Of mihó bisá:  Enseñansa mester ser paga for di e pòtchi general.

3. BON GOBERNASHON

Pueblo di Kòrsou, Un otro punto ku a bini hopi den publisidat durante di e periodo ku ta tras di lomba ta, kon e gobiernu aktual a derocha miones di plaka di pueblo na e tantisimo GATE-nan. Esaki ta demonstrá ku nos pais ta ser mal goberná pa e aktual gobièrnu. algun ehempel di GATE-nan ta:

• Kara pa Laman: Ministro Omayra Leeflang a malgasta i desperdisia mas o ménos 13 mion;
• Brantspùit: a bestèl dos brantspùit i paga dos biaha un suma total di mas ku 2 mion florin i te awe e brantspùitnan no a yega Kòrsou.
• Toko den toko den Curoil. A malgastá 1 mion pa investigá un supuesto froude di 700 mil florin i te dia di awe no a tuma niun desishon.
• Nombramentunan polítiko  den kompanianan di gobièrnu. Durante di e gobernashon di PAR/PNP i FOL tabata un gobernashon kaminda tabata tin mas nombramentu di ruman, primu, amigunan polítiko i te hasta kasa. Konfliktonan di interes ta al órden de dia!
• Malgastamentu di plaka di pueblo den kasonan di Plachi di number I i II.
• CAYCO: Un skandal di marka mayor i ku te dia di awe nan no a manda karta pa informá e desaroyadornan ku nan no ta bini mas na remarke. A pone totalmente un banda e deseonan i proposishonnan di e Federashon i komersiantenan di Otrobanda.
• Nombramentu di sindikalistanan komo pago pa fabor pa a koperá ku struktura estatal: tantu e lider di ABVO komo esun di bond di polis a risibí promoshonnan ku normalmente no ta ser duna den e asparato publiko.
• Dunamentu di trabou na Konsultantnan. Mayoria trabounan den kuadro di SEI ta trabounan ku nan ta yama softprojects.
• Kwartiemakers: Den kuadro di ehekushon di e plannan pa traha un aparato públiko nobo pa Kòrsou a disidí ku ta apuntá konsultantnan komo kwartiermakers. Kaminda tin yen di yunan di tera ku ta ku penshun i konosé e aparato i por kontribuí ku e desaroyo pa nan propio pais! Esaki ta demonstrá ku e partidonan PAR, PNP i FOL no ta kere den nos propio hendenan.
• No papia mes di e GATE mayor kaminda un kompinchi politiko ta konstruí un Mega store sin pèrmit di konstrukshon.   Gezaghebber i gobièrnu ta manda par’e den prome instante, pa despues di 3 dia, e mesun gobièrnu sukumbí pa preshon djariba i duna e pèrmit tòg pa habri.

Asina nos por sigui menshoná mas di e GATE-nan aki. Aki tambe mester bini un KAMBIO. No por sigui goberná e pais aki pa benefisia un PAR di hende ku e tantisimo skandal nan aki. Mester bini un paro inmediato na e praktikanan aki, pasobra nan ta perhudiká pueblo di Kòrsou. Algun akshon ku nos ta proponé ta:

• Reforsá nos organonan di kontròl i duna nan mas outoridat pa publiká loke nan ta enkontra;
• Bini ku e civielrechtrelijke aansparkelijkheid (bai den bo potmonni)!
• Kambia konstitushon i introdusi ku mandatarionan ku konsientemente hinka pais den problema of a kai sera no por bira mandatario i ku si bo viola kualkier lei den pais i tin un investigashion kontra bo, bo mester hala atras.

4. STRUKTURA ESTATAL

Dia 22 di yanuari 2010 lo tin un ELEKSHON PA PARLAMENTU DI ANTIAS I NADA OTRO! Pues, no laga ningun hende gaña bo i splika bo ku tin opshonnan pa vota riba dje. Den elekshon bo NO ta vota pa opshon, pero bo ta vota pa representashon di pueblo. Bo ta vota pa e kandidato ku, segun bo opinion, por yuda nos país mihó! Kemen, elekshon ta e ùniko chens ku un pueblo tin pa skohe e representantenan i e gobiernu ku e meresé!”

Punto di salida pa partidonan MAN, Niun Paso Atras i Forsa Kòrsou ta ku e ekspreshon di pueblo su outodeterminashon na aprel di aña 2005 ta fundeshi di struktura estatal. Tur lei di konsenso òf laga i tur loke ku te awe a wòrdu firma dor di gobièrnunan ku no ta den konkordansia ku esei MESTER wòrdu ahustá òf adaptá.

Nos ta kere firme ku Kòrsou mester sali for di Antia mas rapido posibel.  Loke ta mas importante ku kualkier fecha ta ku Kòrsou mester haña tur e deber, derecho i outoridatnan ku Antia tin awor aki komo pais. Esaki ta e diferensia fundamental ku tin entre nos i esnan ku ta den gobièrnu aktualmente.  E lokual ku nan a negoshá ta un Antia re-strukturá, kaminda ku Kòrsou ta keda mará na man ku pia ku e otro islanan.

Pa loke trata e proseso di outodeterminashon di e otro islanan, MAN/NPA/FK lo no stroba nan di yega nan meta di nan pueblo.  Naturalmente te kaminda ku esaki no ta interferí ku e meta di pueblo di Kòrsou!

Den e kuadro aki nos lo NO sosegá pa sigui lucha ku tur medio huridiko ku ta na nos disposishon pa pueblo di Kòrsou haña e lokual ku ela ekspresá den referendum di 2005.

Nos kier resaltá tambe ku e konstitushon ku ta riba mesa aktualmente ta “more of the same” i e lo no por konta ku nos aprobashon den Konseho Insular na momentu ku e yega na tratamentu.  Nos ta kere ku ta un oportunidat uniko ku nos ta konstruiendo un pais nobo i nos no por keda ku leynan bieu. Mester usa e oportunidat aki pa bini ku un konstitushon moderno ku ta sirbi e pueblo di Kòrsou di un forma digno.

Pueblo di Kòrsou, Ta hopi trabou tin, ku ainda mester wòrdu finalisá. Boso bos ta importante i e ta konta, y nos ta pará porta habri pa skucha boso nan. Nos a konstata durante nos bishita nan den bario, ku Kòrsou tin pobresa skondi. E hendenan tin bèrguensa di pidi yudansa. Rumannan kòrda bon, den Reino di Dios nos tur ta ruman i nos no por laga nos rumannan bai drumi ku hamber, kaminda abo tin pan. Nos mester ta solidario ku otro i komparti ku otro. Nos hendenan tambe tin derechi di biba felis i drumi sin hamber.

Nos ta stima nos pais. Pues nos mester lanta for di soño y mira e realidat. No ta gobièrnu só por bai solushoná e problemanan riba tereno; sosial, edukativo, finansiero, medio ambiente, ekonomiko y turismo. Bosnan mi pueblo, tin ku juda nos. Si boso kier trese un kambio. Bosnan mi pueblo, tambe ta responsabel di e desishon ku dia 22 yanuari proximo.

Tin speransa. Sí, tin speransa, ku e voto ku abo ta bai depositá den e lista di Kambio forma pa MAN-NPA-FK dia 22 di yanuari awor, lo trese un era nobo den politika. Un gobernashon huntu ku pueblo i pa pueblo.

Ku firmesa i determinashon, e 22 hòmber i muhernan riba e lista di KAMBIO aki, formá pa partidonan MAN-NPA-FK ta kla pará, pa sirbi i duna guia na un gobernashon hustu,  sosial i digno na bienestar di pueblo di Kòrsou….

Sea konsiente mi pueblo ku e kaminda ku nos tin ku kana no ta unu fasil. Nan lo pone tur sorto di barera, nan lo traha tur sorto di traba, nan lo te hasta trapa nos interesnan komo pueblo, pa nan interesnan gremial ser sirbi! Bo mes por a eksperiensia esaki den e ultimo 15 aña di gobernashon di asignatura PAR. Pero bosnan por ta sigur ku huntu ku bosnan konfiansa i sosten, nos konvikshon lo ta insuperabel pa aktua na interes di abo i di nos pais Korsou! Ta Pesei mi ke bolbe mustra riba e hecho historiko aki kaminda nos por a pone nos diferensianan un banda i berdaderamente uni pa un kousa ku ta nos dushi isla di Kòrsou.

Kòrsou…. kiko nos kier… ? Un kambioooooooo

Kòrsou…. kiko nos kier… ? Un kambioooooooo

Kòrsou…. kiko nos kier… ? Un kambioooooooo

AWEL… BAN P’E KAMBIO !!!!!!

Dios bendishoná bosnan i bendishoná Kòrsou rikamentu.

Danki