STATEN VAN DE NEDERLANDSE ANTILLEN PARLAMENTU DI ANTIA HULANDES

Presidente di Parlamento
Sr. Atacho
Presente

16 di desèmber 2009
Honorabel sr. presidente,

Frakshonnan suskrito a risibí bo karta fecha 14 di desèmber 2009, den kual bo ta informá nos pa indiká na bo ku nos ke posponé e reunion públiko ku nos a pidi pa trata e tópiko: ‘posishon hurídiko di milisia Antiano i e akontesimentunan rondó di fayesimentu di e hóben militar, sr. Koeiman’ te ku dia 28 di desèmber binidero.
E motibu ku bo ta duna ta ku promé minister a indiká na bo persona ku e no ta disponibel e siman di reunion aki, siendo ku nos frakshonnan a pidi presensia di tantu promé minister i minister Duncan, relashoná ku nan respekto responsabilidat pa e milisia Antiano.

Frakshon di MAN i Forsa Kòrsou sinembargo no ta dispuesto pa konsiderá bo proposishon, enbista di lo siguiente:
For di djabièrnè siman pasa nos a risibí un yamada di griffier di parlamento, ku e mesun petishon pa posponé e reunion te dia 29 di desèmber enbista ku promé minister lo yega Kòrsou dia 16 di desèmber for di Hulanda, lokual ta hasi imposibel pa e atendé e reunion riba e dia ei. Nos mes ora a mustra komprenshon i a indiká ku nos no tin problema pa e reunion tuma lugá dia 17 di desèmber. Sinembargo nos a bolbe risibí un yamada di sekretariado di parlamento informando nos ku e reunion lo no por tuma lugá dia 17 di desèmber parti mainta, pasombra minister Duncan ta okupá parti mainta i na mes momento a informá nos ku promé minister su sekretaria a duna di konosé ku ‘ta kort dag’ pa promé minister por ta presente parti mainta den parlamento, enbista ku ta e anochi anterior e la yega Kòrsou. Riba nos segundo proposishon pa pone e reunion parti mèrdia òf atardi, nos lo a risibí un kontesta djaluna dia 14 di desèmber.
Sinembargo djaluna dia 14 di desèmber griffier a informá nos ku promé minister lo no por ta presente dia 17 di desèmber i a ripití e petishon pa posponé e reunion te dia 29 di desèmber. Riba nos pregunta, kiko ta e motibu ku promé minister no por ta presente, e griffier no por a kontesta i nos a pidi pa indiká parlamento esei por eskrito.

P’esei ta ku asombro nos ta tuma nota di bo karta den kual sin mas bo ta informá nos ku promé minister no ta disponibel den e siman di reunion aktual, sin ku bo ta duna e mínimo di informashon tokante e motibu di promé minister sra Emily de Jongh Elhage no por ta presente. Komo presidente di Parlamento, nos ta asumí ku bo ta sostené e regla demokrátiko ku na momentu ku Parlamento pidi presensha di un representante di gobièrnu, e representante aki mester tin un bon motibu pa no presentá. Pues no ta sin mas ta manda bisa Parlamento ku gobièrnu no ta disponibel, pero ta indiká alabes e motibu pa esaki.

Den e kuadro aki frakshonnan suskrito ta eksigí un splikashon di e motibu di promé minister pa no por ta presente den Parlamento, siendo ku te ku djaluna 14 di desèmber nos a komprondé ku su persona lo regresá Kòrsou dia 16 di desèmber.
Nos ke atvertí ademas, ku nos lo no aseptá ku promé minister ta konsiderá otro kompromiso mas importante ku un reunion pidi pa Parlamento. Komo presidente di Parlamento nos ke urgí bo persona pa eksigí rèspèt di gobièrnu, i den e kaso aki sigur di promé minister pa Parlamento di Antia.

Ademas nos ta di opinion ku promé minister, meskos ku e la hasi tur su esfuerso pa por ta presente na Hulanda pa selebrá dia di reino, nos ta ferwagt ku e ta hasi e mesun esfuerso pa por ta presente den Parlamento.

Konkluyendo nos ke informábo ku nos ta en espera di motivashon di promé minister pa no por presentá den parlamento, manera solisitá pa nos frakshonnan.

Atentamente,

Pa mas informashon por tuma kontakto ku
sr. Navarro 5109700 i/of Eunice Eisden 5208816.